شكل واحد
شكل واحد كل أيامنا
وأحلامنا من كتر الوجع ناحت
والسنين مرت وعدت
وأوراق الربيع طاحت
العمر خلاص فى المنتهى
وأيام العجز لاحت
وأنا ساكت يادوبك بس اتفرج
ما عدش فيه حيل للمناهته والكلام
الجسم تعبان
ومافيش شعره فيه إلا وشابت
وذكرياتنا جوانا عايشه
وفايته فينا جرح ثابت
انتهى زمن الغرام
والجنتله والبرفنات
والدلع ويا البنات
انتهى زمن الشياكه
والأناقة والمغازله
فى الشوارع والحارات
انتهى زمنك وعدى
والكلام الحلو مات
انحنى ظهرك خلاص
مفضلش فيك غير حبة مشاعر
وقلم حبره شتات
مره عاشق ومره ساخط
احساسك اصبح آهات
تلعن وتشتم فى البنات
والذنب ذنبك
أيوه ذنبك
ماهو مافيش حد بعقله
يحب واحده زى حبك
ازاى تحب بكل قلبك
وتبقى عاشق للهلاك
ولما مره اجى اعاتبك
تنفعل وتقول نصيب
أمرك غريب
لا ياسيدى بلاش مكابره
أنت الى غلطان من البدايه
متقولش عاشق او بحب
ما تقولش حاجه
بكره يقولوا عليك كداب منافق
ولا عمره حب
ويحكى فيك كل من هب ودب
الدنيا غابه ما فيش مكان فيها للغلابه
كل إلى فيها بيشترى بحفنة فلوس
حتى الحب شكلوه لونوه خلوه مصالح
ولما تحب بكل صدق تبقى طالح
تبقى طالح
تبقى فاشل يطلعو فيك كل العبر
تبقى اشهر اختبار ف المختبر
يلقبوك بفعل فاضح
والحقيقة أنت واضح
كنت اوضح من الوضوح
كنت عاشق حب بكل صدق
كنت مليان بالطموح
كنت معارض للنفاق والتلون
كنت رافض الرضوخ
كنت بسيط وطيب
كنت حب بمعنى حب
كنت نهر جميل وعذب
كنت طير فى العشق طاير
كنت طاهر
كنت قمر للود ساهر
كنت مليان بالمشاعر
كنت شاعر
كنت شاعر
كنت حاجه جميله جدا
جيت فى وقت مش مناسب
لطخوك شوهوك غيروك
من المشاعر جردوك
عذبوك اشبعوك قهر وظلم
دمروك
طيب كفايه
طيب كفايه ياعم فوق
كنت وكنت وإلى كان ماضى وراح
والجراح بكره تطيب
مافيش حد مات من الفراق
ولا حد عاش وياه حبيب
دوام الحال من المحال
والأيام افضل طبيب
أصحى وفوق من إلى أنت فيه
ارمى الى فات وراك وعدى
ما تقولش بكره شكله ايه
دوس على كل مشاعرك عدى
اياك تهدى
أو يحن لحظه قلبك
خلى كل حاجه عندك
شكل واحد قيمه واحده
وواحده واحده هتلاقى نفسك
مره واحده بجد ماتت
وكل حاجه هتبقى عندك شكل واحد
شكل واحد..
30-10-2018
#حمدى_نورالدين
