الشاعر حمدى نورالدين يكتب خلينا اخوات

بعد سنين فى الحب وناره
جايه تقول خلينا اخوات
استغربت استنكرت
شجبت ادنت
حسيت قلبى كله جروح
وبقيت تايه
بس خضعت
استرجعت شريط الماضى
ووقفت مكان ما بدأت
أضحك وابكى بصوت مجروح
واكتم صوتى بايدى وانوح
راحت روح إلى بيهواك
حتى القلب صبح ممسوح
  ثم ضحكت بكل جرأة
قمت وقفت وكلى شموخ
قلت أنا عادى نبقى اخوات
بس ياريت تفتكرى زمان
وكام من عمرك وانت معايا
عدى وفات
وانك كنت عاشقه هوايا
وان ما بينا حاجات وحاجات
عايزه البعد عادى
مافيش ولا حاجه
يمكن لما تسيبى الحب
تبقى سعيده أو مرتاحه
وانا من قلبى بتمنالك
عيشه هنيه وفرح وراحه
بس ياريت أنا ليا رجاء
ولا خلاص حتى كلامى
مالوش أوقات
قالت سيبنى ابعد عنى
احنا بنكبر وبنتربى
جوه بيوتنا
وعنها بنرحل للمستقبل
وتفضل هى مجرد ذكرى
وعمر وعدى
تقدر تنكر
قلت أنا لأ
بس القلب بيفضل شايل
كل حنينه
لأجمل أيام عمره وأحلى سنينه
عادى ياستى
سيبك منى وعيشى حياتك
ربنا يسعدلك اوقاتك
بس ياريت زى ما اخترتى البعد
تبقى وفيه حتى لنفسك
يعنى لو يوم قلبك حن
دوسى عليه
كام عاشق فى الحب انجن
ولا لاقى حد يدويه
انا مش زعلان ولا حتى هلوم
كله متقدر مقسوم
والاوجاع من حظى تملى
وانا راضى ومسيرى هاقوم
أنا قلبى لساه شغال
والحب افراح بتدوم
مش حزن واوجاع وكئابه
مش بعد ورحيل وهموم
عيزانا اخوات نبقى اخوات
بس ياريت تفهمى حكاويك
قصد كلامك كل ما فيك
هيبقى عليك
انا ماشى وسلامى اليك
فى رساله من خط اديك
مكتوبه من حبر مشاعرك
كان عاشق دلوقتى نسيك..
2-2-2018
#حمدى_نورالدين