الشاعره شرين سعد أحمد تكتب يوميات فتاة صعيدية مطحونة

#مواهب_صعيدية
قصيدة بعنوان : "يوميات فتاة صعيدية مطحونة"
 لـ #شاعرة_جنوب_الوادي
الشاعرة الموهوبة #شرين_سعد_أحمد
بنت نجع الطود قرية القرعان مركز جرجا بسوهاج
******************
هاتي الرطل يا آمال
هنلزوا حفنة فول
وندسه في الملال
بعد الخبيز على طول
قومي فردي.الطراريح
ورشي ردة عليهم
يطلع خبيز مليح
وقطعي ودبيهم
رصيلنا رصة عيش
دا الفرن شغالة
حامية ونارها تعيش
بلا رغي وقوالة
وفردي الرغفان
علشان تهويها
وحطي دفره وميه
للوز وازقيها
قومي دا اخوكي جاي
م الزرع كان يزقي
حطيله لقمة وشاي
خلي الوكل يمري
قومي اسربي الكمون
ودقي شطة عليه
حطيه في حق كبير
ولتمته امليه
قومي طلي ع الحمامات
والقيضي حطيلهم
وزودي الادامات
بالميص هيعدلهم
غطي مكبتنا
واوعي المجور يبوظ
سترتنا في بيتنا
بنجيبه لما نعوز
قومي اصلحي السلم
والمندرة بسرعة
ابوكي أهو جاي
عدى على الترعة
هاتي رحايتنا
ودشي يلا فريك
وادبحي البطة
ومعاها هاتي الديك
قومي حتي في الشامي
وعبي في الغلة
هاتي شوال كبير
وامليه من الحملة
قومي اعلفي البقرة
وابقي ازقي الحمارة
واسربي العدسات
والفول للبصارة
يا ماي أنا اتهديت
وتعبت م الآخر
دبداب أنا دبيت
ومصفطي فاخر
وفطايري خيلانة
ومخروطة عملاها
وعصيدة ملياها
سمنة وعقداها
يا بنيتي شدي الحيل
خليكي قضايا
لاحسن نصيبك يميل
وتقعدي معايا
ياماي وقتي طويل
ولسه أنا صغيرة
والصبر ياما جميل
دا أنا لسه بضفيرة
كربانة ليه يامي
عدلي اكيد أهو جاي
وساعتها تتمني
واديكي تبقي معاي
في جهازي شغالة
وتفرحي بعدلي
وتقولي عماله
و م الفجر أهي عتدبي